که تاسو زمونږ له خوا خبرو ته رابلل شوي یاست، د دې لامل دا دې چې مونږ غواړو چې ستاسو په هکله نور معلومات ترلاسه کړو. ستاسو خپله خوښه ده چې له مونږ سره خبرې کوئ او که نه. تاسو کولای شئ یو لوی کس، چې باور پرې لرئ، له ځان سره راولئ.

تاسو کولای شئ په هغو قضیو کې نظر ورکړئ چې ستاسو او یا ستاسو په کورنۍ پورې تړاو لري. د دې معنی دا نه ده چې تاسو پرېکړه کولای شئ، خو مونږ دا په پام کې نیسو چې ستاسو لپاره څه شی غوره دي.

تاسو باید د قضیې په هکله معلومات ولرئ. په دې اړه له خپل مور او پلار څخه پوښتنه وکړئ. که چیرې قضیه ستاسو د مور یا پلار په اړه وي او ستاسو په اړه نه وي، مونږ نشو کولای تاسو ته د قضیې په هکله معلومات درکړو.

مخکې له راتګ په دې هکله فکر وکړئ چې آیا داسې کوم مهم څه شته چې غواړئ بیان یې کړئ. ستاسو خپله خوښه ده چې څه ویل غواړئ.

د کډوالو د شکایتونو د څېړلو په اداره (UNE) کې به تاسو د شکایتونو د څېړلو ډلې له مشر سره خبرې کوئ. د دې ډلې مشر ستاسو د قضیې مسؤلیت لري او په دې هکله په پرېکړې کولو کې برخه اخلي چې چا ته دې په ناروې کې د پاتې کېدلو اجازه ورکړل شي. تاسو کولای شئ د شکایتونو د څېړلو د ډلې له مشر سره په جلا خونه کې خبرې وکړئ او یا هم په یوه لویه خونه کې له وکیل او نورو لویانو سره یو ځای اوسئ. په دې هکله له تاسو سره مخکې له مخکې موافقه کوو. که په نارويژي خبرې نشئ کولای، ژباړونکی (ترجمان) به درسره مرسته وکړي.

که تاسو په جلا خونه (کوټه) کې د شکایتونو د څېړلو د ډلې له مشر سره خبرې کوئ، نو په نږدې کوټه کې به لویان ناست وي او ستاسو خبرې به څاري. که تاسو وکیل یا سرپرست ولرئ، په دغه خونه کې به هغوی هم ناست وي.

که تاسو نه غواړئ چې مور او پلار او یا وکیل مو خبرې واوري، په دې اړه باید د شکایتونو د څېړلو د ډلې مشر ته خبر ورکړئ.

مونږ غواړو چې ستاسو نظر واورو او دا معلومه کړو چې ستاسو لپاره به څه شی غوره وي. له همدې امله، کیدای شي له تاسو څخه ستاسو د ژوند په اړه مختلفې پوښتنې وشي. که تاسو نشئ کولای او یا نه غواړئ چې ځواب ورکړې کومه ستونزه نه ده، خو هغه څه چې وایاست باید رښتیا وي.

ټول هغه کسان چې ستاسو خبرې اوري د راز ساتلو مکلفیت لري. دا په دې معنی ده چې دوی نشي کولای ستاسو خبرې له بل چا سره شریکي کړي.

کله چې غونډه پای ته ورسېږي، د شکایتونو د څېړلو ډله به د قضیې په اړه پرېکړه کوي. ځیني وختونه ستاسو د خبرو په اړه څېړنه کوو تر څو په دې ډاډه شو چې په قضیې سم پوه شوي یو او که نه.

ډیرې وخت مونږ پرېکړه د وکیل له لارې ستاسو مور او پلار ته استوو.