I årsrapporten for 2024 blir det vist til eit år prega av høg aktivitet, organisatorisk utvikling og målretta innsats for å styrke samarbeid, kompetanse og produktivitet.
– Vi har levert godt på hovudmåla våre i eit år der både saksinngang og interne endringar har stilt høge krav, seier direktør Marianne Jakobsen.
Årsrapporten er den årlege rapporten frå UNE om verksemda det føregåande året. Den blir sendt til Justis- og beredskapsdepartementet, som UNE er administrativt underlagd.
Tre strategiske satsingsområde i sentrum
UNE har i 2024 løfta fram tre prioriterte område frå verksemdsstrategien: attraktiv arbeidsplass med endringsvilje, kontinuerleg kompetanseutvikling og aktiv deltaking i kjedesamarbeidet. Målet har vore å støtte opp om viktige endringar, som innføring av nytt arbeidsplasskonsept og bidrag til digitale utviklingsprosjekt som Modulf.
– Vi har jobba systematisk med kontinuerleg forbetring i alle delar av verksemda. Det ser vi resultat av, i form av både betre produktivitet og meir deling av kompetanse, seier Jakobsen.
Høg saksinngang og aukande saksmengde
Saksinngangen i 2024 har vore den høgaste sidan 2018, og mengda ubehandla saker har auka vidare frå året før. Det har påverka saksbehandlingstida, trass i at produktiviteten har vore god.
– Vi behandla fleire saker enn tidlegare år og har hatt ein positiv utvikling i effektiviteten. Men høg saksinngang over tid gir press på kapasiteten, forklarer Jakobsen.
Framsteg i digitalisering og samarbeid
På digitaliseringssida har UNE blant anna teke i bruk ei løysing for papirfrie nemndmøte, fått systemstøtte for forvaltningssamtalar og utvikla ei ny løysing for praksissamandrag. UNE har også vore ein aktiv bidragsytar i Modulf-prosjektet.
Klar for nye lokale i 2025
Eit viktig internt arbeid i 2024 har vore førebuingane til flytting til nye lokale med aktivitetsbaserte arbeidsplassar. – Vi har jobba godt både med dei fysiske rammene og med organiseringa av arbeidskvardagen for å sikre ein god overgang. Det blir ei omstilling, men vi ser fram til å ta i bruk nye og meir fleksible løysingar, seier Jakobsen.
God økonomistyring gjennom året
UNE har nytta budsjettramma godt og viser til eit mindreforbruk på om lag 11,8 millionar kroner på post 01. Hovudårsaka er at delar av lønskompensasjonen for 2024 først blir utbetalt i 2025, og noko lågare bruk av konsulentar enn planlagt.
– Vi har gjennomført prioriterte oppgåver innanfor ramma, og vi er godt førebudde til å ta med oss ubrukte midlar til neste års aktivitetar, seier Jakobsen.